Jekh maj Zurali Ukraina si te Prindžaren le Romen sar Kotor katar o Avutnipe

Ko anglunipe kadale čhonesko, i Sekuritetaki Konferencia katar o Munich sikavdjas e emerdžento pučimata savenca marel pes i Evropa thaj e aliaturja le Ukainake. Jekh propozalo katar i Amerika savo rodel akceso ke le Ukrainake raro phuvjake mineralurja sar pokinipe vaš o militarno džutipe andjas kritike kotar o prezidento Volodimir Zelenski. Ande kado vaxt, le Evropake liderja den duma pal neve sekuritetake garancie thaj o šajpe te kerel pes jekh Evropuni armia, sa kadala ando vaxt so e negociacie vaš i pačja dikhel pes ke džan angle bi te ovel i Evropa direkto thodi andre.

Sa kadalenca, o avutnipe le Ukrainako ka ovel determinisardo na toke katar e militarno strategie vaj katar e diplomatikane negociacie, ama vi lako šajpe te siguril pes ke laki ekonomia si zurali. Kadja sar phendjas o Presidento Zelensky o berš kaj nakhlo kana prezentisarelas le Ukrainako Andrutno Reziliencako Plano, "Jekh zurali ekonomia si o klučo katar o barjaripe pe lungo vrjama, o nacionalno arakhipe thaj te lel pes sama pal o manušikano kapitalo. E ukrainiancurja si musaj te aresen te pheren penge ambicie kathe andi Ukraina." Thaj te šaj kadava te ovel, e romane komunitete trebal te oven pindžarde sar centralno ande lengo avutnipe. 

Jekh andar e maj bare pharimata andar savende nakhel i ekonomia le Ukrainaki avdives si te siguril le butjaki zor savi trebal te inkerel o barvalipe, i inovacia thaj i produktiviteta. E bisnisurja andar sa e industrie—katar e konstrukcie thaj i produkcia dži ke servisurja thaj sastipe—maren pen te arakhen le butjarnen kaj truban len. Sa ande kodo vaxt, si romane komunitete kaj si len potencialo bi lilo samate—manuša kaj kamen te keren buti, te anen kontribucia thaj te vazden jekh avutnipe. But lendar, šaj te phenas, ke nakhen andar pharimata kana mangen te roden buti: soske na-i len edukacia vaj profesionalo treningo, limitisardo akceso ke profesionalo netvorkurja thaj purane percepcie pal lenge butjaki etika vaj pakiv. E terne roma na si jekh zorali participacia ande le butjako marketo vaj andi edukacia. Kadava si jekh ekonomikano xasaripe kaj i Ukraina našti te ignoril.

Vi anglal o maripe, e romane komunitete andar i Ukraina nakhle andar sistemikane bariere thode anglal i edukacia thaj e thana le butjake. Butivar, e čhave sas čhudine rigate katar o siklipe soske na sas len bazutne resurse sar transporto, xabe thaj gada. Akana, kana i Ukraina lel baro maškarthemutno džutipen thaj gatisarel pes vaš i rekonstrukcia palal o maripe, kadala bisajekhimata si ando risko te oven maj phare kana na len pes specifično masure. 

Jekh prioriteto trebalas te ovel te sikaven le terne romen e trebutne džanimata vaš e thana le butjake so truban le firmen andar i Ukraina avdives thaj tehara. Vaš kado hatjarel pes ke treban putarde edukaciake programurja vaš i dujto šansa, te buhljaren e kalifikaciake kursurja thaj te keren investicie ando profesionalo siklipe thaj ande edukacionalo komunitetake centrurja thaj te lokjarel pes o kontakto le manušengo kaj den butjake le romen so roden buti. O lačho nevipe si ke eksistuin specifično finance vaš kadaja buti. O berš kaj nakhlo, e EU partnerurja dine pesko lav te den 700 milionurja euro te keren nevi kalifikacia vaš 180.000 ukrajniancurja ande trin berša. Sa kadalenca, kadala programurja na aresen ke but roma, andar o modo sar sas godisarde, e strikto kriterie pal o eligibiliteto thaj soske na sas kerde prindžarde karing e romane komunitete. Odoleske, trebal te lokjarel pes o proceso le limasko andi buti, te lokjarel pes i bitrebutni birokracia, thaj te ovas sigurno ke, atoska kana varekon si gatisardo te kerel buti ke na-i artificialo bariere kaj na meken les te kerel nevi kalifikacia vaj te anel peski kontribucia.

Ande sa kodo vaxt, trebal lili samate jekh problema savi na vakerel pes butivar: e stereotipurja. Varesave manuša kaj len andi buti na kamen te den buti le romenge soske von ašunde paramisja kaj na sikaven i realiteta—ramosarimata save sikaven ke na-i motivacia vaj preparacia. Kado sas vi o kazo le Ilyanako* savi palal so našli katar o Toretsk, zumavdjas te lel jekh than butjako ande jekh komercialo centro andar o Pavlohrad. "Pherdem i anketa, kerdem i aplikacia thaj sas man jekh but lačhi konversacia po telefono. Sa kadalenca, kana arakhljam amen thaj i gazda dikhlja sar me sikavav, phendjas mange sigo i standardo fraza—‘Ka akharav tut palpale’—thaj na arakhlem nijekhdata jekh than butjako.” O čačipe si, ke kana den pes lenge lačhe instrumenturja thaj e čačutne šanse, e romane butjarne si sa kadja kapabilo, sa kadja butjarne thaj sa kadja ambiciozno sar sa e avera.

Pal amaro raporto „Maripe vaš jekh maj Čačutno Avutnipe”, jekh štarto kotor andar e romane familie kaj sas pučle si len džene kaj servisaren andi Ukrainaki armia, jekh trinto kotor andar kadala si voluntaturja. Lengi eksperienca sikavel jekh baro angadžmento vaš lengi phuv thaj kadaja si jekh baza vaš o paruvipe le percepciengo palal lengi komuniteta. O maj nevo raporto pal i Socialo Koezia andar i Ukraina, sikavel ke e roma si maj dur jekh andar e maj bikamle grupe andar i Ukraina. Sa kadalenca, vi kana na-i demografikane ververimata pal i socialo toleranca, o raporto sikavel signifikanto regionalo diference, o Kherson thaj o Mykolaiv sikaven i maj bari toleranca. Kadaja buti sikavel ke i socialo toleranca barili ande regionurja opral o fronto thaj ande kodola thana katar našle e manuša. 

O Birokratiko Zido kaj Inkerel le Romen Avrjal 

Perdal i edukacia thaj e thana butjake, le kherengo sekuriteto thaj e socialne servisurja treban prioritisarde. Dopaš andar sa e roma interno našle manuša (IDP) andi Ukraina si thanjarde ando regiono Zakarpattia, ama toke jekh štarto kotor andar lende sas registrisarde vaš oficialo džutipe, de sar enja andar deš IDP-urja andar aver thana, pal amaro rodipe. E birokratikane bariere na meken le romen dureder te resen o bazutno džutipe, maškar lende vi e kompensaciake programurja vaš e khera save sas peravde katar o maripe. Kadala čhinavimata ando džutipe treban lile samate ande rekonstrukciako plano te na barjaren pes e bisajekhimata anglal o maripe.

Po but vrjama, e diskusie vaš e Roma andi Ukraina sas prezentisarde sar pučipe vaš i integracia de sar pindžaripe katar lengo vašno rolo ando avutnipe le themesko. Kado trebal te paruvel pes. Te sigurisarel pes ke e eforturja le lačharimaske pal o maripe te den prioriteta le romane komunitetenge na si jekh koncesia—si jekh vitalo paso karing le Ukrainaki zor thaj sukceso. Duj po trin kotora andar e roma saven pučljam vakeren kaj xasarde love andar i kauza le marimaski thaj jekh po trin kotora vakerde pal pengi finacialo situacia ke si andi kriza. Pašal kodova, duj andar deš roma mothode ke si len phare psihologikane pharimata save mangen profesionalno griža. Te resljol pes kadala urgento pharimata trebalas te oven jekh prioriteto andi lungo-vrjamaki planifikacia le themeski.

O Čačutno Testo vaš o Avutnipe le Ukrainako

Kana le Evropake liderja kiden pen te vakeren e avutne pasurja vaš i Ukraina, o fokuso na trebalas te thol pes toke pe sekuritetake garancie thaj pe hatjarimata pal e mineralurja. O čačutno testo ka ovel kana i rekonstrukcia le Ukrainaki si vazdini pe jekh fundacia čačimaski thaj oportuniteturja vaš savore themutne. E investicie ando avutnipe le romane komunitetengo na-i toke jekh etikani obligacia—si jekh strategikano imperativo vaš o stabiliteto thaj o barvalipe le Ukrainako ande berša kaj aven.