O Romano Dives ande jekh Nevi Lumja

I lumja si paruvdi katar o maripe. I Ukraina aresli o centro katar le sekuritetake prioriteturja andi Evropa. I Gaza morcol amaro hatjaripe le manušikane dukhako thaj barjarel i toleranca karing e but mudarimata. O maripe le Iranosa khelavel e energiake diza thaj paruvel e militarno aliance.

So hatjarel pes andar kadaja buti ando Romano Lumjako Dives?

Orta vaš kodo o 8-to Aprilo si vašno. Ando berš 1971 kana e romane liderja kidine pes khetanes ando London, lile jekh decizia kaj sas anglal peski vrjama. Deklarisarde jekh flago, jekh himno, jekh ćhib thaj jekh politikano identiteto. Bi te adžukeren o prindžaripe, definisarde amen sar manušipe thaj sar jekh nacia ando keripe.

Von kerde akcia ando maškar le Šudre Marimasko, ande jekh lumja modelisardi katar zorale geopolitikane tensie. Von na adžukerde i atencia vaj o legitimiteto. Von kerde len ande jekh khetani vizia. Kado si so von mukle amenge palpale.

Kotar kodova, e romane komunitete thaj organizacie siklile sar te phiraven pes le institucienca, sar te vazden programurja, sar te arakhen fondurja thaj sar te vakeren i čhib le politikaki. Kadala eforturja sas importanto. Putarde udara thaj ande šanse save kodola ando 1971 berš phares šaj godisarenas.

Ama o buhljardo politikano ambiento paruvdilo. Le Evropake prioriteturja kerjon maj but tranzakcionalo, maj but phiravde katar o intereso thaj maj but thode pe sekuriteta thaj stabiliteto. E manušikane čačimata thaj i socialo inkluzia ačhjon kotor andar i politikani čhib, ama na-i len but pharipe ande le deciziako proceso. Kado na-i te khosel so kerdjas pes. Ama paruvel e kondicie telal savende džas maj dur.

Kathe si o than kaj i ideja vaš o korkoro-džutipe aresel importanto. O korkoro-džutipe si pal o kolektivo organizisaripen. Si pal o šajpe te ovas khetanes perdal e thema, komuniteturja thaj diference ‒ te keras buti ande jekh khetani direkcia vi kana na sam ande jekh than. Na hatjarel pes izolacia thaj na xasarel pes o trebujpe le partenerjengo.

Kado ingerel amen ke jekh reflekcia maj phari, ama trebutni. 

Si milja iniciative, organizacie thaj lokalno sukcesurja šerutnjarde katar e roma. But lendar si zurale. But lendar paruvde dživimata ande signifikanto modurja. Ama butivar, ačhjon limitisarde ke lenge maj pašutne konteksturja. Na konektisaren pes maškar pende. Na aresen kotor andar vareso maj buhlo savo si te ačhjol.

Si amen but andar e fundacie. Talento thaj resimata. Netvorkurja thaj eksperienca. Komuniteturja save sikavde zor opral e generacie. O pučhipe si kana šaj te phandas kadala elementurja ande jekh modo kaj te anel duringeripe, buhlipe thaj lungo-vrjamaki struktura.

O Romano Lumjako Dives na-i toke o barodives le identitetako. Si jekh momento reflekciako pal so vazdas. Na numaj sar sam dikhle, šunde vaj akharde katar aver manuša, ama vi so keras khetanes ande amari komuniteta. So ka džal maj dur. So ka barjol. So ka ovel importanto ande berša so aven. Soske ande jekh lumja modelisardi katar i zor thaj katar e sigo interesurja, o than si cira dino. Si kerdo katar kodola kaj organizisaren pes, konektisaren pes thaj vazden ande modurja kaj buhljaren thaj inkeren.

Ando 8-to Aprilo pindžaras amen ande soste keras khetanes – na sar si dikhlo averendar, ama ande amare kondicie.